Бұл туралы Астана қаласының туризм, денешынықтыру және спорт басқармасының баспасөз қызметі хабарлайды.
Қазақстандық боксшы Әділбек Ниязымбетов бұл күні 81 келіде өнер көрсеткен бірден-бір жерлесіміз болды. Оның молдовалық Владимир Челеспен жекпе-жегі кешкі бағдарламаны қорытындылады.
Әлібек боз кілемде қарсыласын әп-дегенде шаушайдан алып, тікелей соққылармен шабуылға көшті. Алайда Владимир жекпе-жекке асыққан жоқ, бірді-екілі соққымен қарсылық көрсетіп қана жүрді, Дегенмен тақау тұстан қазақстандық боксшы екі соққыны дәл тигізді. Сонымен алғашқы үш минуттың қорытындысы: есеп — 6:4. Келесі раундта боксшылар алыс қашықтықтан орташа қашықтыққа жақындап келді, одан әрі таяудағы ұрыста да еркін сілтеді. Қарама-қарсы ұрыс салған боксшылар жекпе-жегінің бұл бөлігінде Әділбек қарсыласын тегеурінді қимылымен ықтырып, инициативаны өз қолына алды. Енді есеп 13:6 болып Ниязымбетов алға суырылып шықты. Ал үшінші раундта Челес бар күшін салды. Жаттықтырушысының нұсқауын орындай отырып, соққы санын да еселей түсті. Дегенмен бұл жалпы жеңіс үшін жеткіліксіз болды. Сөйтіп, 16:11 есебімен біздің боксшымыз жеңіске қол жеткізді.
Енді ол келесі жекпе-жекте Азияның қазіргі чемпионы кореялық Ким Хионкьюмен сынға түседі.
Бүгінгі жарыс кестесінде 69 келіде Серік Сапиев Карлос Санчезбен (Эквадор) қолғап түйістіреді.