Арқанкерген бекетінде қызметтестерін қырып салды деп айыпталған қарағандылық шекарашының туыстары осы ұйымнан көмек сұраған екен. Олар өз кезегінде америкалық меценаттың өкілімен кездесу өткізіп, қаржы мәселесін шешіп берген. Енді адвокат Серік Сәрсеновке төленуі тиіс 15 мың доллардың біразын осы қор көтеретін болды. Айта кетейік, миллиардер Джордж Соростың қызметінің тек қайырымдылық мақсатты көздейтініне күмәнмен қарайтындар көп. Әсіресе ТМД елдеріндегі түрлі көтерілістердің бас демеушісі деген аты бар. Сол «Сорос қоры» енді Челах ісіне қызығушылық танытып отыр.
Роза Ақылбекова, Халықаралық адам құқығын қорғау бюросының Қазақстандағы директоры:
— Бюро Челахқа қатысты сотта қол қусырып отыра алмады. Сондықтан «Сорос қорының» қаржылық көмегімен адвокатты осы іске қосты. Оған төленетін қаржы көлемі нақтыланып, қазірше ауызша келісім алдық. Енді құжаттармен бекіту жұмысы қалды.