Бұл – Қазақстан оқушылары арасында сыни ойлау, шешендік өнер және азаматтық белсенділікті дамытуға бағытталған екінші маусым.
Лагерьдің жұмысын «Debat Eli» қоғамдық қоры ұйымдастырып отыр. Ұйымдастыруға қолдау көрсеткендер: Нұрсұлтан Назарбаев қоры, Қазақстан Республикасы Оқу-ағарту министрлігіне қарасты Республикалық қосымша білім беру оқу-әдістемелік орталығы.
Еліміздің түкпір-түкпірінен лагерьге қатысу үшін 300-ден астам өтініш түскен, олардың ішінен 50 оқушы шақырылды. Қатысушылар көшбасшылық қабілеттерін, мотивациясын және дебат қозғалысына деген қызығушылығын көрсете білді.
Лагерьге қатысу – толығымен тегін: тұру, тамақтану және оқу шығындарын ұйымдастырушылар өз мойнына алған.
Лагерь бағдарламасы дебат мәдениетін, сыни ойлауды, көпшілік алдында сөйлеу шеберлігін, көшбасшылықты және азаматтық сананы дамытуға бағытталған.
Бір апта бойы қатысушыларды келесі іс-шаралар күтеді:
• Дебат және көпшілік алдында сөйлеу бойынша тренингтер
• Сыни ойлау мен аргументация бойынша мастер-класстар
• Әртүрлі форматтағы дебаттар (британдық парламенттік, Карл Поппер және т.б.)
• Жетекші спикерлердің дәрістері.
Тренерлер қатарында – ұлттық және халықаралық турнирлердің жеңімпаздары мен финалистері болған Қазақстанның жетекші дебатшылары бар.
Академияның арнайы қонағы – Рок Хафнер, 2021 жылғы Еуропа студенттік дебат чемпионатының жеңімпазы, Словениядан келген әлемдегі ең мықты дебатшылардың бірі. Ол лагерьдің ағылшын тілді секциясында сабақ өткізіп, қазақстандық қатысушылармен тәжірибесімен бөлісуде.