Бұл көрсеткіш өткен күнмен салыстырғанда 1%-ға төмендеп, яғни 5,09 теңгеге арзандаған. Сол арқылы доллар бағамы шамамен бір жыл бес ай бұрынғы, 2024 жылдың 28 қазандағы, ең төменгі деңгейге жетті, деп хабарлайды Caravan.kz медиа порталы.
Наурыз айында теңгенің жағдайы бірқалыпты жақсарды. Осы айдың басынан бері долларға қатысты теңге 2,3%-ға қымбаттап, яғни 11,36 теңгеге нығайған. Ал 2026 жылдың басынан бері ұлттық валюта 3,8%-ға, немесе 19,33 теңгеге күшейген.
Ұлттық валюта позициясының нығаюына әлемдік мұнай бағасының өсуі де әсер етті. Таяу Шығыстағы қақтығыс салдарынан мұнай нарығы тұрақсыз болды. Израиль мен АҚШ Иранның әскери және мұнай инфрақұрылымына жасаған соққыларға жауап ретінде Иран Ормуз бұғазындағы кеме қатынасын іс жүзінде бөгеп тастады. Бұл жағдай жанармай тиелген танкерлердің, әсіресе Парсы шығанағы елдерінен шығатындардың тасымалдауын қиындатты. Сол себепті Лондонда Brent маркалы мұнайдың мамыр айындағы фьючерстері барреліне $100 жоғары деңгейде саудаланып отыр.
Алғашында сарапшылар геосаяси шиеленіс теңгенің әлсіреуіне ықпал етуі мүмкін деп болжам жасаған еді. Себебі белгісіздік артқан кезде инвесторлар дамушы елдердің активтерінен шығып кетуі мүмкін. Қазақстандық бағалы қағаздар да осындай тәуекелге ұшырауы ықтимал еді. Алайда қазіргі уақытта бұл болжамдар расталған жоқ. Кейбір сарапшылардың айтуынша, шетелдік инвесторлар Қазақстанды жоғары мұнай бағасынан пайда көретін ел ретінде қабылдауы теңгенің нығаюына әсер етіп отыр.
Сонымен қатар, ұлттық валюта евро мен рубльге қатысты да нығайып, бір жылдағы ең жоғары деңгейге жақындады. Қазіргі бағамы еуроға 557,82 теңге, рубльге 6 теңге шамасында.