Тыйым салынған дәрі қолданғаны үшін биыл 4 палуан боз кілемге шықпайды, деп хабарлайды КТК. Арасында тіпті турнирдің 2013-ші жылғы жеңімпазы Айбек Нұғымаров та бар. Сондай-ақ Самир Мәмедов, Мереке Тұрашев пен Александр Косачевтің қанынан мельдоний препараты табылған.
— 2014 жылы да 4 спортшымызды дәл осылай допинг үшін «Қазақстан барысынан» шеттеткен болатынбыз. Қандай қиын болса да, әділеттілік керек. Біз де сол допингпен күресіп келе жатырмыз. Сондықтан осындай ауыр шешім қабылдауға тура келді, дейді Қазақ күресі федерациясының президенті Арман Шораев.
Ұйымдастырушылардың айтуынша, палуандар допинге мамырда қан тапсырған. Ал, мельдоний адамның бойында бірнеше ай сақталады екен. Жалпы, «Қазақ барысының» ақтық сыны келесі айда Астанада өтеді. Бұл жолы 30-ға жуық палуан белдеспек. Жеңімпазға 25 миллион теңге ақшалай сый, автокөлік пен Елордадан пәтер беріледі. Ал, допингпен ұсталған Нұғымаровтан атағы мен сыйлықтары қайтарыла ма, ол жағы әзірге белгісіз.
