Дүниежүзі Еврейлерінің Конгрессі төрағасы Қазақстанның көршілес елдермен достық байланысына жоғары баға берді

Дүниежүзі Еврейлерінің Конгрессі (ДЕК ) Қазақстанның және Қазақстан Елбасы Нұрсұлтан Назарбаевтың көршілес елдермен орнатқан тығыз достық байланысына жоғары баға береді . Бұл туралы бүгін, 17-маусымда Дүниежүзі Еврейлері Конгрессінің төрағасы Исраэль Зингер Астанада Елбасы Нұрсұлтан Назарбаевпен кездесуден кейін атап көрсетті.

И.Зингер әсіресе Н.Назарбаевтың діндер мен діни конфессиялар арасында жылы арабайланыс орнатуға деген талпынысын жоғары бағалады. «Дүниежүзі Еврейлерінің Конгрессі президенттің бұл бастамаларын толық қолдайды»,- деді И.Зингер.

Дүниежүзі Еврейлерінің Конгрессі төрағасы сондай-ақ, Н.Назарбаевпен екі арадағы әңгіме барысында 2003-жылдың күзінде Астанада өткізуге межеленген діни Конгресске дайындық жұмыстары туралы талқыланғанын хабарлады.
«Барлық елдер мен діндер үшін айрықша маңызды бұл жобаны ДЕК қолдайды» ,-деді ол.
И.Зингер аталмыш жобаның егжей-тегжейі туралы Дүниежүзі Еврейлерінің Конгрессі президент әкімшілігімен бірлесе отырып дайындық жұмыстарын бітіргеннен кейін бірнеше аптада хабарлауға уәде берді.