Елбасы Ақтауда Қазақстанның тұңғыш танкері -"Астананы" қарсы алу шарасына қатысты

Салтанатты рәсімде Елбасы «Қазақстанның көп векторлы транспорттық саясатты жүзеге асырып отырғанын» еске салып, «Астана» танкері осы орайда Әзербайжан, Ресей және Иран бағытында кәдеге асатынын айтты. «2010-жылы мұнай өндіру мөлшері 100 млн. тоннаға дейін жететіндігіне байланысты біз дедвейті 60 мың тоннаны құрайтын танкер салуды көздеп отырмыз»,- деді президент.

Бұдан бұрын да хабарлағанымыздай, отандық жеке танкер флотын құру бағдарламасының аясында «Қазтеңізкөлікфлоты» мен Выборг кеме жасау зауыты арасындағы бас келісімге сәйкес Қазақстанның тапсырысы бойынша «Астана» танкері 2004-жылдың 11-желтоқсанында Выборгта өткеріп берілді. Дедвейті 12 мың тоннаны құрайтын, ұзындығы 49 метр, ені 17,3 метр, жылдамдығы 10 узел болатын танкердің жобасын Ресейдің «Вымпел» конструкторлық бюросы жасап шығарды. Танкер 2004-жылдың 5-тамызында суға жіберілді.