Елбасы сөз бостандығын әлдекімдердің жеке басының қамына пайдалануына жол бермеуге бағытталған шараларды күшейтуді ұсынады

«Демократия — заңның өктемдігі дегенді тағы да бір мәрте еске салуға мәжбүр болып отырмын. Іштен ірітуге бағытталған әрекеттері мен мәлімдемелері заңға қайшы келіп жататын әрі сол әрекеттері қазіргі конституциялық құрылымды күйретуге бағытталған кейбір саяси партиялар, қоғамдық бірлестіктер, БАҚ-тар мен жекелеген тұлғалардың іс-қызметін біз бұдан былай дәл осы көзқарас тұрғысынан бағалайтын боламыз»,- деді президент.

Н.Назарбаевтың атап көрсетуінше, «қоғамдық-саяси бағыттағы бірқатар БАҚ-тарда ұлтаралық араздықты өршітуге, ұлттық немесе рулық-тектік артықшылықты насихаттауға және басқа да заңға қайшы әрекеттерге жүйелі түрде жол берілуде». «Бұл мүлдем жол беруге болмайтын деректер. ҚР Ата заңының кепілі ретінде мен еліміздің негізгі заңының ережелерін бұлжытпай орындауды баршадан талап ететін боламын»,- деді президент.
Елбасы сондай-ақ, заңға бағыныштылық тұрғысынан азаматтарға саясаткерлер үлгі болуы тиіс деп атап көрсетті. «Азаматтарды заң аясында әрекет етуге сол саясаткерлер оқытып-ағартуға міндетті. Сондай жағдайда ғана біз шынайы демократия орната аламыз»,- деді Елбасы.