Бұл туралы 24.кз хабарлады.
Өткен жылдың өзінде 2 жарым мың адам жол үстінде жан тапсырған. Бұған қоса әртүрлі деңгейде жарақат алған 24 мың жерлесіміз бар. Бұл жөнінде Сенатта өткен жол қозғалысы саласындағы құқықтық реттеудің жай-күйі мен проблемаларына арналған жиында айтылды. Жол апаттарының жиілеуіне ең алдымен жылдамдықты шамадан тыс асыру себеп. Бұған қоса еліміздегі жолдың сапасы мен дер кезінде медициналық көмек көрсету мәселесі ақсап тұр дейді мамандар.
"Ауғанстандағы 10 жылға созылған соғыста 15 мың адам қаза тапты. Ал егер біздегі жол-көлік апаттары азаймай, осы күйінде қалса, алдағы 10 жылда 25 мың жерлесімізден айырыламыз. Бұған қоса миллиондаған адам жарақат алады. Сондықтан бұл өте өзекті мәселе және шұғыл шешімді қажет етеді",- деді ҚР Парламенті Сенатының төрағасы Қасым-Жомарт Тоқаев
Ал Ішкі істер минстрі өз кезегінде жол-көлік апаттары соңғы жылдары азайып келе жатқанын айтады. Мәселен, биыл ол 5 пайызға төмендепті. Бұған, әрине, кешенді іс-әрекеттер, оның ішінде заңнамалық шаралардың қолға алынуы өз септігін тигізген. Бұған қоса депутаттар, шетелдік тәжірибені негізге ала отырып, жол полицияларының жұмыс сапасына қатысты да бірталай мәселені көтерген. Министр жақсы нәтиже алу үшін, сондай жағдай жасалу керек деп күтпеген мәлімдеме жасады.
"Грузияға біздің қызметкерлер бірнеше мәрте барды, барлық қызметкерлер комиссия болып та, барып та қайтты. Ол жақтағылар полиция қызметкерлерінің бәрін жұмыстан шығарып жіберіп, айлықты 2 есе көтерген. Содан кейін жаңадан жұмысқа алған. Мархабат. Біз мұндай қадамға баруға дайынбыз",- деді Қалмұхамет Қасымов.
