Елімізде тұқым себу науқаны аяқталды

Елімізде жаппай тұқым себу науқаны аяқталып, жоспар артығымен орындалды. Бұл туралы KZ-today тілшісіне ҚР ауылшаруашылығы министрлігі егін шаруашылығы департаментінің агротехникалық саясат басқармасы бастығының орынбасары Думан Әбілдинов хабарлады.

4-маусым күнгі жағдаймен 13 млн. 245 мың гектарға тұқым себілді. Ал жоспар бойынша 13 млн. 155 мың гектарға тұқым себілуі тиіс болатын. Сөйтіп, жоспар 100,7 процентке орындалды. Ал 10 млн. 798 мың гектарға себіледі деп жоспарланған бидай тұқымы 10 млн. 891 мың гектарға себіліп, жоспардың 100,9 процентін құрады. 1 млн. 844 мың гектарға себіледі деп жоспарланған арпа 1 млн. 836,7 мың гектарға себіліп, жоспардың 99,6 процентін иемденді.

Ауылшаруашылығы министрлігінің мәліметі бойынша, Қызылорда және Оңтүстік Қазақстан облыстары жоспарды орындаған жоқ. Алайда, Д.Әбілдиновтың айтуынша, бұл облыстар қалған дәнді дақылдарды күзде себе алады.
Арпа егу жоспарын Ақмола (95,2%), Шығыс Қазақстан (93,6%) және Қостанай (94%) облыстары орындай алған жоқ.