Еліміздің аумағын айқындап, шекарамызды бүтіндеп алу - еліміз үшін айрықша маңызды оқиға - ҚР Елбасы

"Мемлекет шекарадан басталады және алыс тарихты емес, бергі тарихтың өзін алып қарайтын болсақ, соғыстардың барлығы да жер дауынан басталған. Сол себепті шекара мәселесі, төңірегіміздің тұтастығын, шекарамыздың бар екенін әлемдік нормаға сәйкес белгілеу - бір үлкен белес". Бүгін, 27-қаңтарда Алматыдағы резиденциясында 2004-2006 жылдарға арналған "Мәдени мұра" мемлекеттік бағдарламасын іске асыру жөніндегі қоғамдық кеңес мүшелерімен кездескен Елбасы Нұрсұлтан Назарбаев осындай пікір білдірді,- деп хабарлайды KZ-today тілшісі.

Н.Назарбаев ата-бабамыздың тарихында еш уақытта болмаған түгел шекараны белгілеп, «халықаралық құқықтық деңгейде ең жақын көршілеріміз — Қытай, Өзбекстан, Түрікменстан, Қырғызстан және Ресеймен арадағы шекарамызды айқындап алдық» , деп атап көрсетті. Бұл жұмыстар 1994-жылы басталған , ал қазіргі жағдаймен біз «халқымыздың тарихында алғаш рет 14 мың шақырымдық мемлекеттік шекарамызды белгіледік»,- деді мемлекет басшысы.

Бұдан бұрын да хабарлағанымыздай, Қазақстан-Ресей мемлекеттік шекарасын делимитациялау туралы келісімге 2005-жылдың 18-қаңтарында Елбасы Нұрсұлтан Назарбаевтың Мәскеуге ресми сапары кезінде қол қойылды.