Еліміздің оңтүстігінде 5 келі героин мен 242 келі марихуананы сатуға жасалған әрекетке тосқауыл қойылды

ҚР ІІМ-нің есірткі саудасы және есірткі айналымымен күрес комитетінің қызметкерлері ішкі істер департаментінің есірткі саудасымен күрес басқармасының қызметкерлерімен бірлесе жүзеге асырған шұғыл шаралар барысында 4 келі 809 грамм героинді сатуға әрекет жасаған Шымкент тұрғыны қолға түсті. Бұл туралы KZ-today тілшісіне ҚР ІІМ-нің баспасөз қызметінен хабарлады.

Күдікті жалға алған пәтерінде ұсталды. Қазір ол уақытша тергеу қапасында отыр. Оның үстінен қылмыстық іс қозғалып, тергеу басталды.

Сонымен бірге ҚР ІІМ баспасөз қызметінің хабарлауынша, ұйымдасқан қылмыспен күрес басқармасының қызметкерлері Қордай аудандық есірткі саудасымен күрес басқармасының қызметкерлерімен бірлесіп Тараздың 44 жастағы тұрғынының 242 келі 430 грамм марихуананы сатуға жасаған әрекетіне тосқауыл қойды.
Күдікті шұғыл шаралардың барысында Жамбыл облысы Қордай ауданы Қасық ауылының маңында ұсталды. Күдікті уақытша тергеу абақтысына қамалды. Оның үстінен қылмыстық іс қозғалып, тергеу амалдары жүргізілуде.