Ақтауда фитнес жаттықтырушысының өліміне қатысты сот үкімі шықты, деп хабарлайды Caravan.kz медиа порталы
Айта кетейік, Ақтауда бір топ еркек 29 жастағы фитнес-жаттықтырушы Алина Серікованы ұрлап, есірткі беріп, аса жауыздықпен зорлаған. Оқиғадан соң жәбір көрген қыз 9-қабаттан секіріп, көз жұмды.
Бұған дейін марқұмның отбасы қылмыскерлерге қатаң жаза беруін талап етіп, сотқа аппеляциялық шағым түсірген болатын. Алғашқы сот үкімінде судья күдіктілерге тағылған айыпты қайта саралап, жеңіл жаза тағайындаған.
Бүгін, 31 қаңтарда сот басты фигурант Нұргелді Сейітқалиевті өмір бойына бас бостандығынан айырды.
Қалған сотталушыларға ұзақ мерзімді жаза тағайындалды:
Еркебұлан Аманқос – 16 жыл
Аралбай Мерей – 13 жыл
Дархан Құлбас – 13 жыл
Қуаныш Үсенғали – 13 жыл
Марқұмның отбасына моральдық және материалдық шығын ретінде 30 миллион теңге төленеді.
Алина Серікованың ісі қоғамда үлкен резонанс тудырды. Оның туыстары сот шешімі әділ болуын талап етіп, басты айыпталушыға ең қатаң жаза берілуін сұраған еді. Бұл жағдай Қазақстандағы гендерлік зорлық-зомбылықпен күрес мәселесін қайта күн тәртібіне шығарды.
Еске салайық, бұған дейін nemolchikz_official әлеуметтік желіде 2024 жылдың мамыр айында Ақтауда болған жантүршігерлік оқиғаны жариялаған еді.
14 мамыр күні түнде Ақтауда бір топ ер адам спортпен айналысып, фитнес-жаттықтырушы болып жұмыс істеген қызды көлікке күштеп отырғызып, мефедрон беріп зорлаған. Таңға дейін қызды қинап, қала берді телефоны арқылы 2 млн теңге көлемінде несие рәсімдеген. Қыздың туыстары сот шешіміне қарсы шағым түсіріп, істің әділ қаралуын сұраған еді.