Англия мен Уэльс арасындағы матчта англиялықтар алға шығып отырды. Яғни олар ә дегеннен-ақ шабуылды үдетті. Бірақ нәтижеге қол жеткізе алмай қойды. Сөйтіп жүргенде, Уэльс құрамасы бірінші болып есеп ашты. Гарет Бэйл 42-ші минутта 30-35 метр жерден айып добын теуіп, гол салды. Ал 56-шы минутта есеп теңесті. Англиялық Джейми Варди қарсыластарының қақпасына допты дәл теуіп кіргізді. Шешуші гол соңында қосымша берілген уақытта соғылды. Оны қақпаға туралаған – алаңға орын алмастырып шыққан Дэниел Старридж. Бұл Англия құрамасының 92-ші минуттағы голы еді.
Англия – Уэльс – 2:1
Англия құрамы (негізгі): Харт, Уолкер, Кэхилл, Смоллиг, Роуз, Дайер, Руни, Лаллана, Алли, Стерлинг, Кейн.
Уэльс құрамы (негізгі): Хеннесси, Гантер, Тейлор, Честер, Уильямс, Дэвис, Аллен, Ледли, Рэмси, Бэйл, Робсон-Кану.
Украина мен Солтүстік Ирландия арасындағы матчтың бірінші таймы іш пыстырарлықтай болды. Екі жақ аңысын аңдумен, аса сақтықпен әрекет жасап жүрген соң ба, есеп ашылмай қойды. Командаларға, әсіресе, ирландықтарға келесі таймда ғана жан біткендей еді. Олар осы екінші таймның алғашқы сәтінде-ақ гол салды. Ирландық Гарет Макаули 49-шы минутта қарсыластарының қақпасына допты баспен ұрып кіргізді. Бұл ойында да соңғы гол қосымша уақытта соғылды. 96-шы минутта ирландық Найалл Макгинн қақпашы қайтарған допты қайта теуіп кіргізді. Сөйтіп, матч Солтүстік Ирландия құрамасының жеңісімен аяқталды.
Украина – Солтүстік Ирландия – 0:2
Украина құрамы : Пятов — Шевчук, Ракицкий, Хачериди, Федецкий — Степаненко, Сидорчук — Коноплянка, Коваленко, Ярмоленко — Селезнев
Солтүстік Ирландия құрамы: Макговерн — Д. Эванс, Маколи, Кэткарт, Хьюз — Даллас, Норвуд, Дэвис, К. Эванс, Уорд – Вашингтон
Германия мен Польша арасындағы матчта екі жақтың да қақпасына доп дарымай қойды. Командалар бір-біріне беріспеді. Әрине, қауіп тудырған сәттер, қол соқтырар тұстар аз болған жоқ. Бірақ доп аутқа ауытқып кете берді. Мүмкіндіктер мол болғанымен, сол оңтайлы сәттерді екі жақтың да ойыншылары жіберіп алып жаттты. Әдеттегідей қосымша уақытта берілді. Бірақ одан да нәтиже шыққан жоқ. Сөйтіп, бұл биылғы Еуропа чемпионатындағы алғашқы 0:0 боп аяқталған ойын болды. Айта кетейік, Германия мен Полша арасындағы матчтың осылай аяқталуына байланысты Украина ойыннан шығуы тиіс.
Германия – Польша – 0:0
Германия құрамы: Нойер, Боатенг, Хуммельс, Хектор, Хеведес, Гётце (Шюррле, 66), Дракслер (Гомес, 72), Кроос, Хедира, Озил, Мюллер
Польша құрамы: Фабиански, Глик, Енджейчик, Крыховяк, Паздан, Пищек, Мончиньски (Йодловец, 76), Блащиковски (Капустка, 80), Милик, Гросицки (Пешко, 87), Левандовски Р.
Бүгінгі ойындар:
17 маусым, жұма
18:50. «Kazsport». Италия — Швеция
21:50. «Қазақстан». Чехия — Хорватия
00:50. «Қазақстан». Испания — Түркия