Италия мен Швеция арасындағы матчтың басында допты бірден скандинавиялықтар игеріп алып кетті. Одан кейін доп екі жаққа кезек бұйырып отырды. Бірақ бұл жағынан бірінші таймда шведтер басым түсті. Алайда одан келер пайда жоқ еді. Ешкім гол соға алған жоқ. Сөйтіп, бірінші тайм есеп ашылмай аяқталды. Осыны дұрыс болмады деді ме, Италия екінші таймда ширақ ойын бастады. Бірақ екі жақ әлі де беріспей жатқан еді. Тек 88-ші минутта матчтың алғашқы және соңғы голы Италия құрамасы тарапынан соғылды. Ауттан лақтырылған допты Симоне Дзадза баспен ұрып, Мартинс Эдерге жіберді. Ал Эдер бірнеше қорғаушыны алдап өтіп, гол соқты.
Италия – Швеция – 1:0
Италия құрамы (негізгі): Буффон, Барцальи, Бонуччи, Кьеллини, Де Росси, Кандрева, Пароло, Флоренци, Пелле (Дзадза, 60), Эдер, Джаккерини.
Швеция құрамы (негізгі): Исакссон, Юханссон, Нильссон-Линделоф, Гранквист, Ольссон, Ларссон, Экдаль, Чельстрём, Форсберг, Гвидетти, Ибрагимович.
Чехия мен Хорватия арасындағы матч қызықты өтті дей аламыз. Әсіресе, хорваттар чехтардың қақпасына қауіп төндірумен болды. Сөйтіп жүріп, олар 37-ші минутта есеп ашты. Иван Перишич Чехияның қақпасына сол қапталдан кеп гол салды. 59-шы минутта тағы бір Иван есепті екі еселеді. Ол Иван Ракитич еді. Осылайша хорваттар айқын басымдыққа ие болды. Десе де, олардың қақпасына чех Милан Шкода 75-ші минутта гол салды. Ойын аяқталуға санаулы минуттар қалғанда, хорватиялық жанкүйерлер алаңға от лақтырып, соның кесірінен матчты тоқтата тұруға тура келді. Бірақ бұл үзіліс чехтарға тиімді болды. Сәлден кейін ойын қайта жалғасып, қосымша берілген уақытта Чехия құрамасы есепті теңестірді. Томаш Нецид пенальтиден гол соқты.
Чехия – Хорватия – 2:2
Чехия құрамасы: Чех, Кадержабек, Сивок, Губник, Лимберски, Дарида, Росицки, Крейчи, Скалак (Шурал, 67), Плашил (Нецид, 86), Лафата (Шкода, 67)
Хорватия құрамасы: Субашич, Стринич (Врсалько, 90), Срна, Чорлука, Вида, Модрич (Ковачич, 62), Ракитич (Шильденфельд, 90), Перишич, Брозович, Бадель, Манджукич
Испания мен Түркия арасындағы матчта испандар үлкен басымдықпен жеңіске жетті. Ал түріктер оларға бірде-бір гол соға алған жоқ. 34-ші минутта есеп ашылды. Голды Альваро Мората соқты. 3 минут өткеннен кейін Нолито есепті екі еселеді. Оған қарсылас қорғаушы байқамай допты беріп қойған еді. Нолито бұл мүмкіндікті мүлт жіберген жоқ. Ал 48-ші минутта Мората екінші голын соқты. Сөйтіп, ойын 3:0 боп аяқталды.
Испания – Түркия – 3:0
Испания құрамы: де Хеа, Хуанфран, Рамос, Пике, Альба, Бускетс, Фабрегас, Иньеста, Сильва, Нолито, Мората.
Түркия құрамы: Бабажан, Генюл, Балта, Эркин, Туфан, Топал, Озьякуп, Инан, Туран, Чалханоглу, Йылмаз.
Бүгінгі ойындар:
18 маусым, сенбі
18:50. «Kazsport». Бельгия — Ирландия
21:50. «Қазақстан». Исландия — Венгрия
00:50. «Қазақстан». Португалия — Австрия