Австрия мен Венгрия арасындағы матчта алдыңғылары ойынға бірінші боп белсене кірісті. Александр Драгович допты қарсыластарының қақпасына сол аяқпен бағыттаған еді. Бірақ онысы бағанаға барып тиді. Венгрлер де қалыспай, Ласло Кляйнхайслер қарсыластарының қақпасына қарай алыстан доп тепті. Бірақ оны Австрия қақпашысы Роберт Альмер қағып ала қойды. Бірінші тайм біткенше екі жақ та осылайша бір-біріне кезекпен шабуылдаумен болды. Ал есеп екінші таймда ашылды. Венгр Адам Салаи 62-ші минутта Австрия құрамасының қақпасына гол соқты. Сосын оны 87-ші минутта Золтан Штибер екі еселеп жіберді. Сөйтіп, Венгрияның құрамасы жеңіске жетті.
Австрия – Венгрия – 0:2
Австрия құрамы: Альмер, Хинтереггер, Драгович, Фукс, Алаба, Арнаутович, Баумгартлингер, Харник, Юнузович, Кляйн, Янко.
Венгрия құрамы: Кирай, Гузмич, Кадар, Фиола, Ланг, Джуджак, Надь, Кляйнхайслер, Гера, Немет, Салаи.
Португалия мен Исландия арасындағы ойын нәтижесін журналистер сенсацияға балап отыр. Әрине, көпшіліктің Португалия басымдық танытады деп ойлағаны анық. Роналду сияқты ойыншысы бар командадан көп үміт күтті жұрт. Ол үміт бірінші таймда ақталды. Андре Гомеш берген допты Нани қақпаға салды. Сөйтіп, 31-ші минутта Португалияның пайдасына есеп ашылды. Бірақ Исландия құрамасы оңайлықпен беріле қоймады. Олар екінші таймда есеп теңестірді. Исландиялық Биркир Бьярнасон 50-ші минутта гол соқты. Ойын осылайша тең аяқталды.
Португалия – Исландия – 1:1
Португалия құрамы: Патрисиу, Геррейро, Пепе, Карвалью, Виейринья, Данилу, Мариу, Моутинью, Андре Гомеш, Нани, Роналду.
Исландия құрамы: Халдорсон, Севарссон, Р. Сигурдссон, Арнасон, Скуласон, Г. Сигурдссон, Гуннарссон, Гудмундссон, Б. Бьярнасон, Сигторссон, Бодварссон.
Бүгінгі ойындар:
15 маусым, сәрсенбі
18:50. «Kazsport». Ресей — Словакия
21:50. «Қазақстан». Румыния — Швейцария
00:50. «Қазақстан». Франция — Албания