Федерация кеңесінің төрағасы Қазақстанға жасаған сапарының нәтижесіне дән риза

РФ Федералдық жиыны Федерация кеңесінің төрағасы Сергей Миронов Қазақстанға жасаған сапарының нәтижесіне дән риза. Бұл туралы ол бүгін, 14-желтоқсанда "Қазақстан даму банкі" АҚ-ның президенті Қамбар Шалғымбаевпен кездесуден кейін журналистерге берген сұхбатында мәлімдеді, деп хабарлайды KZ-today тілшісі Астанадан.

«Ең бастысы, біз сапар барысында бірқатар принциптік мәселелерді, соның ішінде Біртұтас Экономикалық Кеңістікті құруға қатысты нақты мәселелерді қарап үлгердік»,- деді С.Миронов.

Ресей парламентінің жоғарғы палатасының төрағасы Қазақстан басшылығымен кездесу барысында жария етілген екі жақты қарым-қатынастың қазіргі ахуалына берілген бағаға қанағаттанғандық білдірді. «Екі жақты қарым-қатынас тек саяси ғана емес, сонымен бірге жоғары экономикалық деңгеймен де сипатталады»,- деді С.Миронов. Ол 2004-жыл қорытындысы бойынша Ресей мен Қазақстан арасындағы тауар айналымы 7 млрд. долларды құрағанын еске салды. «Бұл әрине, қомақты көлем, дегенмен, екі мемлекет арасындағы ынтымақтастықтың әлеуеті үшін шарықтау шегіне саналмайды»,- деді Федерация кеңесінің төрағасы.