Футбол: Еуропа лигасында ойнайтын қазақстандық командалардың қарсыластары белгілі болды

Бұл турнирде Қазақстан атынан бірінші кезеңнен бастап Қарағандының «Шахтер» және Қостанайдың «Тобыл», ал екінші кезеңнен Атыраудың «Атырау» командасы сынға түсетін болады. Бірінші іріктеу кезеңінің матчтары шілденің 1-і және 8-і күндері, ал екінші іріктеу кезеңі шілдінің 15-і және 22-сі күндері өтеді. Жеребе бойынша, «Шахтер» бірінші кезеңде Польшаның 14 дүркін чемпионы болған «Рух» командасымен кездеседі. Бірінші ойын Қарағандыда өтеді. Бұл командамен болатын екі матчта жерлестеріміздің мерейі үстем болып жатса, онда «Шахтер» келесі кезеңде Мальтаның «Валетто» командасымен ойнайды. Ал, «Тобыл» болса бірінші кезеңде Босния және Герцеговинаның «Зриньски» клубымен шеберлік байқасады. Бірінші ойын Қостанайда өтеді. Бұл текетіресте «Тобыл» табысты өнер көрсетсе, онда келесі кезеңде Сан-Мариноның «Тре-Пенне» командасына қарсылас атанады. Ал, «Атырау» екінші іріктеу кезеңінде Словакияның «Нитра» және Венгрияның «Дьор» командаларының қай жеңгенімен ойнайды. Біздің команда бірінші матчты өз алаңында өткізеді.