Әлем чемпионатының іріктеу турнирі аясында жерлестеріміз Ресей, Ирландия, Швейцария және Израиль құрамаларымен бірге 6-шы топта өнер көрсетуде. Біздің команда бұған дейін іріктеу турнирі аясында 4 кездесу өткізіп, соның барлығында жеңіліп қалды. Олар бірінші ойынын 2009 жылғы қыркүйектің 24-де сырт алаңда Ирландия құрамасымен өткізіп, 1:2 есебімен ұтылды. Ал, қазанның 24-де өткен екінші кездесуінде сырт алаңда Израильге 1:0 есебімен жол берді. Қазанның 29-да болған үшінші ойынында өз алаңында Ирландияны қабылдап, тағы да 1:2 есебімен ұтылып қалды. Ал, өз алаңында 2010 жылғы наурыздың 28-де өткен төртінші кездесуде Ресейден 0:6 есебімен ойсырай ұтылды. Сөйтіп, 4 ойында әлі бірде-бір ұпай жинамаған біздің команда өз тобында соңғы орында келеді.
Айта кетейік, команданың сүреңсіз ойынына серпін беру үшін сәуір айында Футболдан Қазақстан әйелдер құрамасының жаңа бас жаттықтырушысы болып молдовалық маман Евгений Пусиков тағайындалған болатын. Енді жерлестеріміз Е. Пусиковтың жетекшілігімен Израиль және Швейцария құрамаларына қарсы ойнайтын болады.