«Астана Арена» стадионында өткен матчта елордалық «Локомотив» Шымкенттің «Ордабасы» командасын қабылдады. Теміржолшылардың командасы қарсыластарынан айласын асырып, 1:0 есебі бойынша жеңіске жеңді. Дегенмен орталық матч Павлодарда болды. Турнир кестесінде екінші орында тұрған жергілікті «Ертіс» үшінші орында келе жатқан Ақтөбе командасын қабылдап, қажетті үш ұпайды қанжығаға салды. Ойындағы есеп 1:2. Ақтөбенің сүрінгенін Қарағандының «Шахтер» командасы тиімді пайдалана білді. Ол Тараз қаласында жергілікті командамен күш сынасып, ірі есеппен жеңісті олжалады. Осылайша «Шахтер» футболшылары «Ақтөбені» сырғытып, турнирлік кесте бойынша үшінші орынға көтерілді.
Қалған кездесулерде күтпеген оқыс есептер тіркелген жоқ. Фавориттер өздерінің мықтылығын дәлелдей алды. Тур барысында бірінші орында тұрған Қостанайдың Тобылы көш соңында келе жатқан Көкшетаудың Оқжетпесімен кездесіп, 1:3 есебімен жеңіске жетті. «Жетісу» — «Атырау» кездесуінде 1:2 есебі тіркелді. «Атыраудың» бұл жеңісі турнирдің үздік алты командасы қатарында қалуына айтарлықтай жағдай жасады.
20-шы тур ойындарынан кейін Қостанайдың Тобылы 41 ұпаймен көш бастауда. Екінші орынға 40 ұпаймен Павлодардың «Ертісі» жайғасқан. Қарағанды «Шахтері» 36 ұпай жинап үшінші орынға ие болып келеді. «Атырау» мен «Локомотив» 5-ші орынға таласып келеді. Олардың еншісінде 32 ұпайдан бар.