Алғашқы алтылыққа іліккен командалар жүлделі орындар үшін таласса, көш соңындағылар премьер-лигадан шығып қалмау үшін жанталасуда. Алматылық «Қайраттың» есебінде 25 ұпай болса, өткен турда Көкшетаудың «Оқжетпесін» 2:0 есебімен (қос допты да соққан команданың сұрмергені, ганалық шабуылшы Мозес Саки) ұтқан Оралдың «Ақжайығы» 23 ұпаймен 11-орында келеді. Соңғы орындағы «Оқжетпестің» есебінде 22 ұпай бар. Қарашаның 1-інде өтетін турда «Қайрат» пен «Оқжетпес» өзара күш сынасса, «Ақжайық» Талдықорғанда жергілікті «Жетісумен» алаңға шығады. Қарашаның 6-сы күнгі ақтық айқаста «Ақжайық» «Ордабасыны» қабылдаса, «Қайрат» сырт алаңда «Таразбен» кездеседі. «Оқжетпес» өз алаңында «Жетісумен» шеберлік байқасады. Міне, осы матчтарда қай командалардың премьер-лигадан «ұшып кететіні» шешіледі.
