Германия елшілігі виза алуға құлықты Қазақстан азаматтарына алалаушылық жасалатыны туралы бірқатар республикалық БАҚ-тарда жарияланған мәліметтерді жоққа шығарды

Германияға виза алуға құлықты Қазақстан азаматтарына елшілік консулы Штефан Лаастың тарапынан алалаушылық жасалатыны, оның азаматтарды сыйламайтындығы туралы бірқатар республикалық БАҚ-тарда жарияланған мәліметтер "шындыққа жанаспайды". Бүгін, 27-мамырда Алматыда өткен баспасөз мәслихатында Германия Федеративтік Республикасының Қазақстандағы істерін жауаптанған уақытша сенімді өкіл Райнер Морэль осындай мәлімдеме жасады,- деп хабарлайды KZ-today тілшісі.

Бірқатар республикалық БАҚ-тардың ақпараты бойынша, жалпы Германия елшілігінің жұмысы, соның ішінде, консул Ш.Лаастың виза алуға өтініш бергендерге деген қарым-қатынасы қазақстандықтардың көңілінен шықпай отыр. Мәселен, «Комсомольская правда» газеті елшінің Қазақстан азаматтарын «доңыздар немесе малдар» деп атап, «олардың төлқұжаттарын бетіне лақтыратындығы» туралы көптеген жағымсыз жайттарды хабарлаған.

Сондай-ақ, журналистердің пайымдауынша, Қазақстан азаматтарының Алматыдағы Германия елшілігінің ғимараты алдындағы ұзыннан-ұзақ кезектері жасанды әрекет, және ол аталмыш дипломатиялық өкілдік тарапынан виза саясатын сауатсыз жүргізуге қатысты болып отыр.
Осындай жайтқа түсініктеме берген Р.Морэльдің мәлімдеуінше, әлгіндей кезектер «Германияға баруды қалайтын Қазақстан азаматтарына жалған ақпараттар тарататын туристік фирмалардың кінәсінен пайда болуда».