«26 қарашаға қараған түні KazSat-1 жер серігі жұмыс қабілетінен толық айрылып, қандай бұйрыққа да жауап бермей қалды. Ол мүлдем жұмыс істемейді», -деді Т. Мұсабаев.
Оның айтуынша, «KazSat-1 жер серігін сатып алу мәселесі тіпті Қазақстан заңдарының аясында да шешілмеген. Ең сенімді, жақсы ғарыштық техниканы жасайтын танымал фирмалардан сатып алуға тендер жүргізу қажет еді, ал біздің KazSat-1 жер серігін сенімді деп айта алмайсың».
Сонымен бірге, Т. Мұсабаевтың айтуынша, «KazSat-1 туралы келісім-шартқа бұл салада шамалы болса да түсінігі бар адамдар, тіпті аэроғарыш комитетін басқаратын адамдар да қол қоймаған. KazSat-1 ғарыштық жүйесін құру туралы келісімге Ұлттық инновациялық қордың басшысы қол қойған. Күрделі ғарыштық жүйелерге Ұлттық инновациялық қордың қандай қатысы бар екендігін мен әлі күнге дейін түсіне алмай отырмын»,- деді агенттік төрағасы.
«Роскосмостың жетекшісі мемлекет басшысына жер серігі «керемет жұмыс істеп тұр» деп жеткізіп үлгерген. Ал біздің мамандар болса KazSat-1 жұмыс істеу қабілетінін айрылған жер серігі деген тұжырымға келіп отыр. Ал олар бізге 10 қарашада оны басқаруға беруге талпынды»,- деді Т.Мұсабаев.
Сонымен бірге, Т. Мұсабаевтың хабарлауынша, кешікпей KazSat-2 жер серігін ұшыру жоспарлануда. «Қазір KazSat-2 жер серігін ұшыру жоспарлануда. Бұл жер серігін де KazSat-1 секілді Қазғарыш агенттігі пайда болмай тұрып қолға алған. Енді оны кері бұру мүмкін емес. Төлемнің 65% жасалып, KazSat-2 жер серігі жасалды, ол біріншісімен бірдей», — деді агенттік төрағасы.
«Бұл ретте жер серігінің конструкциясын өзгертіп, сенімді құрамдас бөлшектерден жасау үшін ұсыныстар енгізіп үлгердік», — деді Т. Мұсабаев.
Ақпаратты пайдаланған жағдайда «Казахстан Сегодня» ақпараттық агенттігіне сілтеме жасау міндетті
