Фильм желісі Тимур есімді қазақ полицейінің әлемге әйгілі хакердің соңына түсуінен басталады. Кейін аңғал жігіт аңдамай жүріп, қылмыс әлемінің “қуыршағы” болғанын түсінеді. Бірақ өте кеш. Себебі “елес қуамын” деп жүріп, сүйікті қызынан, жұмысынан, достарынан біржолата айырылып тынады. Ашынған жігіттің ендігі мақсаты – кінәлілерден кек алу. Экшн жанры болғандықтан мұнда ұр да жық көріністер жетерлік. Тек трюктердің 90 пайызы актерлердің өз орындауында болмақ. Қазақ киносындағы мұндай таңсық дүниеге машықтану үшін басты рөлдердің бірін сомдайтын жас актер Санжар Мәдиев арнайы Америкаға барып, тәжірибе алмасып келуіне тара келегінін айтады.
Санжар Мәдиев, актер:
-Біз нағыз экшн жанрындағы туындыны шығару үшін кино өндірісіндегі ең озық деген студиялармен жұмыс істеп, біраз білім алып қайттым. Және түсірілім барысында көмегі өте көп тиді.
Санжардан өзге фильмде оның сүйіктісінің рөлін сомдап Әсел Сағатова, әйгілі терминатор қыздың бейнесімен танымал голливудтық Кристанна Локен, соңғы уақытта Қазақстанды айналшықтап шықпай жүрген Арманд Ассанте және Алла Пугачеваның немересі Никита Пресняков ойнайды. Қазақ қызымен көңіл қосып жүрген кіші Пресняков ақырындап қазақша да үйреніп қалыпты.
Никита Присняков, актер:
— Мен сені сүйемін, қалыңыз қалай? – Кім үйретті? –Сүйген қызым. – Аты кім? — Аида!
Ал қаржы жағына келер болсақ, барлық шығын “Қазақфильмнің” еншісінде. Дегенмен продюссердің айтуынша, қаламақысы көп болмаса да шетелдік актерлер қазақстандық шақыртуды бірден қабыл алған.
Ернар Мәліков, “Охота за призраком” фильмінің продюсері:
-Бюджет көлемін қазір айтуға келмейтін шығар. Өйткені көптеген нәрселер әлі түсірілген жоқ. Бірақ шамамен 1 миллион доллардан жоғары.
Әзірге фильмнің тек жартысы дайын. Және прокат желісі халықаралық деңгейде қамтылуы үшін алдағы түсірілімдерге Майкл Мендсон, Марк Дакаскос сынды тағы екі Голливуд жұлдыздары шақырылмақ. Фильм үлкен экранға алдағы көктемде шағатын болады.
