осы салмақ категориясы бойынша әлемнің экс-чемпионы 33 жастағы австралиялық боксшы Дэниэл Гилмен болатын сайыста өз атағын қорғайды.
Осы алдағы кездесу жайында Геннадийдің бапкері Абель Санчес өз ойларын ортаға салған еді.
«Мен бапкер ретінде, Дэниэл Гил туралы уайым жемеймін, мен Головкинді уайымдаймын, — деді Санчес ESNEWS порталына берген сұхбатында, — Егер де мен Головкинді рингке нағыз бабында шығара алсам, онда Гил бола ма, басқа бола ма бізге қарсы тұра алмайды. Гилдің артықшылықтары көп, кемшілігі аз. Бірақ егер Геннадий Головкин бар күшін салса, онда Гилдің рингте не істеп, не қоятыны біз үшін маңызды болмай қалады. Бәлкім маған сенбессіздер, бірақ Головкин осы күнге дейін әлі ешбір жекпе-жекте бірде-бір соққысына жүз пайыз күшін салған емес. Рингте, спаррингтерде көргендеріме қарап айтар болсам, ол әлі ешкімді бар күшімен ұрған емес. Мұның қажеті де жоқ, өйткені оған тең келер қарсылас әлі шыққан жоқ. Кім біледі, мүмкін Гил дәл сондай қарсылас болар. Мен бұдан 4 жыл бұрын Головкинмен алғаш рет «лапаға» тұрғанымда, оның соққылары мені аяғымның бақайларына дейін шымырлатты. Ол мені қатты ұрған да жоқ, бірақ мен: «Мәссаған, міне соққы! Құдыретті күш деген осы шығар, сірә» — деп ойладым. Бұл оның табиғи күш-қуаты, бірақ бұл, сонымен қатар, техника, тайминг, баланс. Әрине, көп еңбектің, белгілі бір әдістердің, жаттығулардың арқасында соққының қуатын арттыруға болады, бірақ Құдай берген күшке жетпейді. Және ол өзінің бұл дарынын дұрыс жолда пайдаланып келеді», — деді өз сөзінде Геннадийдің бапкері.
Қорыта келе айтар болсақ, АҚШ жерінде рингке алғашқы шыққан кезінен бастап әлі күнге дейін бірде-бір қарсылас Геннадийге лайықты қарсылық көрсете алмаған. Түптеп келгенде, Головкин әлі бір де бір раунд жеңіліп көрген жоқ. Абель Санчес Дэниэл Гилдің табандылық көрсететіндігіне, ал Головкиннің бұрынғы жекпе-жектерге қарағанда бұл жолы өзінің сан қырлы шеберліктерін көрсете алатындығына үміт артуда.
«Гил — лайықты қарсылас. Мүмкін ол Геннадийді соңғы раундтарға жетелейтін шығар. Кім біледі, мүмкін Геннадийге бұл жолы көп бокстасуға, көп қорғануға тура келетін шығар. Көреміз», — деді Абель Санчас.
