Бұл туралы Caravan.kz медиа порталы Sputnik.kz-ке сілтеме жасап хабарлайды.
John Deere компаниясы Қостанайда ауыл шаруашылығы техникасын шығарады, деп хабарлады үкіметтің баспасөз қызметі.
Өндіріс Agromash зауытының Локализация орталығында іске қосылады.
«John Deere өндірісін іске қосу Қазақстан фермерлері үшін жаңа мүмкіндіктер ашады, жергілікті жағдайларға бейімделген тракторлар мен комбайндар ассортиментін кеңейтуге, сондай-ақ мемлекеттік қолдау шаралары негізінде оларды сатып алуға қол жеткізу арқылы ауыл шаруашылығы техникасы паркін жаңарту қарқынын жеделдетуге мүмкіндік береді», — деп жазылған хабарламада.
Қазақстандық ауыл шаруашылығы тауарын өндірушілер отандық өндіріс техникасын қолжетімді шарттар бойынша сатып ала алатынын атап өту маңызды.
Жобаны іске асыру экономика, білім беру саласын дамытуға, оның ішінде ауыл шаруашылығында сервистік және салалық мамандарды: агрономдар, инженерлер, механизаторлар және IT мамандар даярлау үшін қосымша ресурстарды инвестициялауға мүмкіндік береді.
Алдағы 5 жылда цифрлық технологияларды енгізу және еліміздің агроөнеркәсіп кешенінің тиімділігін арттыру мақсатында негізгі алаңға айналатын заманауи 3 сервистік орталық салынады.
Айта кетері, президенттің тапсырмасына сәйкес, елімізде жылдық 5%-бен отандық өндірістің ауыл шаруашылығы техникасының жеңілдетілген лизингі бағдарламасы іске қосылды, оған 120 млрд теңге бөлінді. Биыл 3,2 мың қазақстандық фермер жеңілдетілген лизинг бағдарламасы аясында өз автопарктерін жаңартуға мүмкіндік алады.