2025 жылдың қаңтар–наурыз айларында елде шамамен 22,5 мың неке тіркелді — бұл өткен жылмен салыстырғанда 16%-ға (4,3 мыңға) аз. Бұл көрсеткіш 2014 жылдан бері (коронавирус шектеулері болған 2020 жылдың II тоқсанын қоспағанда) ең төмен деңгейге түсті. Бұл туралы статистика мәлімдеді, деп хабарлайды Caravan.kz медиа порталы.
Неке саны барлық өңірлерде азайған. Ең ірі төмендеулер Түркістан облысында (-19%) және Алматы қаласында (-21%) тіркелді.
Сондай-ақ, жалпы некелесу коэффициенті (1000 адамға шаққандағы көрсеткіш) да төмендеуде: биылғы алғашқы үш айда ол 4,47 болса, өткен жылы бұл көрсеткіш 5,33 болған. Ең төмен коэффициент Батыс Қазақстан облысында (3,72), ал ең жоғарысы — Алматы облысында (5,26) тіркелді.
Мамандар мұны әлеуметтік-экономикалық факторлармен, неке институтына деген көзқарастың өзгеруімен және жастардың неке құруды кейінге қалдыруымен байланыстырады.