Бұл туралы Caravan.kz медиа порталы kaz.inform.kz-ке сілтеме жасап хабарлайды.
-Мамандарды даярлау физика, энергетика, электротехника, тау-кен инжинирингімен байланысты 18 білім беру бағдарламасы бойынша жүргізіледі. 2024-2025 оқу жылына осы бағыттар үшін 5 246 білім беру гранты бөлінді. Оның ішінде бакалавриат – 4 530 грант, магистратура – 590 грант, докторантура – 126 грант. Дайындық отандық университеттерде де, ядролық технологияларға маманданған жетекші шетелдік жоғары оқу орындарымен ынтымақтастықта да жүзеге асырылады. «Болашақ» мемлекеттік бағдарламасы бойынша «Атом және ядролық өнеркәсіп» мамандығы басым бағыттардың қатарына кіреді. 2024 жылдан бастап осы бағдарлама бойынша төрт магистрант АҚШ, Ұлыбритания және Францияда білім алып жатыр, — деп жазылған министрлік мәліметінде.
Бұл елдердің қатарына Ресей мен Мажарстан қосылмақ.
-Атом саласы бойынша кадрларды даярлау қазақстандық жоғары оқу орындарында 5 білім беру және екі дипломдық бағдарламалар (Ядролық физика, ядролық инженерия, ядролық физика және атом энергетикасы, теориялық ядролық физика) негізінде жүргізіледі. Сонымен қатар, Қазақстан шетелдік әріптестермен ғылыми-білім беру базасын дамыта бастады. Франция, Ресей және Венгриямен бірқатар құжатқа қол қойылды.
Қазақстан Республикасының отын-энергетикалық кешенін дамытудың 2023-2029 жылдарға арналған тұжырымдамасына сәйкес, атом саласын жоғары білікті кадрлармен қамтамасыз ету үшін шетелдік бағдарламалар бойынша оқуға гранттар бөлу бойынша жұмыс жүргізіледі. Сондай-ақ жұмыс істеп тұрған АЭС-терде практикалар мен тағылымдамалардан өту ұйымдастырылады, — делінген ресми жауапта.