«Қыркүйектің 25-26 күндері Алматыдағы Балуан Шолақ атындағы спорт сарайында ҚР Президенті жүлдесі үшін өтетін Әлем кубогы 2012 жылы Лондонда өтетін жазғы Олимпиада ойындарының лицензиялық іріктеу жарыстарының бірі. Халықаралық дзюдо федерациясының тәртібі бойынша енді әр спортшы рейтингтік ұпай жинап, үздік 22 балуанның қатарына кіруі керек. Бұл үшін олар жылына кемінде 7-8 жарысқа қатысып, ондағы жақсы ұпай жинаған 5 турнирдің қорытындысы бойынша ұпай жинайды», дейді Ербол Қырғызбаев. Бас бапкердің айтуынша, дзюдо күресінде биыл Тунистен басталған Лондон Олимпиадасының лицензиялық турнирлері 2012 жылы мамыр айында тоқтатылады. Жалпы мұндай дүбірлі додалар әлемнің әр қиырында ай сайын 2-3 жерде өтуде. Сол себепті ҚР Дзюдо федерациясы да Қазақстанда өткелі отырған жалғыз лиценциялық турнир саналатын бұл Әлем кубогында жоғары нәтижеге қол жеткізуді алдына мақсат етіп қойып отыр.
«Құрама сапы қазіргі таңда жасарды. Онда сақа балуандардан Максим Раков, Ринат Ибрагимов, Дастан Ықыбаев, Болат Тимур сияқты санаулы спортшы бар. Біздің бұл жарыста ең алдымен соларға үміт артып отырмыз. Сондай-ақ болашағынан үлкен үміт күттірер жас дзюдошылар да бар», дейді бас бапкер Ербол Қырғызбаев.
