ҚР Қаржы министрі Мәди Такиев пен Ұлттық экономика вице-министрі Азамат Әмрин бизнес өкілдеріне ҚҚС мөлшерлемесін өзгерту туралы ұсынысын таныстырды, деп хабарлайды Caravan.kz медиа порталы.
«Біз мынадай механизмді қарастыруды ұсынамыз: жалпы белгіленген ҚҚС мөлшерлемесі – 16%, ауыл шаруашылығы өнімдерін өндірушілер үшін толық босату, ал кейбір салалар үшін – аралық мөлшерлеме 10%. Осылайша, Үкімет ұсынған сараланған мөлшерлемелер 16%, 10%, 0% және толық босатудан тұрады», – деп түсіндірді Әмрин.
Үкіметтің мәліметінше, қазіргі заңнамаға сәйкес, аграрлық сектордағы шаруа қожалықтары ҚҚС төлемейді, ал заңды тұлғаларға берілген жеңілдіктер есебінен бюджетке төлеуге тиісті салықтың тек 30%-ын ғана төлейді. Жаңа механизм бойынша, бұл санаттағы кәсіпкерлер ҚҚС төлемейтін болады.
«Бұл қазақстандық ауыл шаруашылығы өнімдерін (картоп, қызанақ, пияз және т.б.) бәсекеге қабілетті етеді. 10% мөлшерлеме қолданылатын салалар әлі де бизнес қауымдастығымен талқылануда», – деп мәлімдеді Үкімет.
Негізгі өзгерістер:
-Жалпы ҚҚС мөлшерлемесі – 16%
-Ауыл шаруашылығы өнімдерін өндірушілер – ҚҚС-тан толық босатылады
-Бірқатар салалар үшін – 10% мөлшеріндегі аралық мөлшерлеме
-Саралау жүйесі: 16%, 10%, 0% және толық босату
Бұл шаралар экономиканың әртүрлі секторларына қолайлы жағдай жасауға бағытталған, – деп түсіндірді Азамат Әмрин.
