Елордалық полицейлер "Сергек" бейнебақылау жүйесі арқылы сауда орталығындағы күзетшіге шабуыл жасалған қылмыстық әрекетті әшкереледі, -деп хабарлайды Тengrinews.kz тілшісі астаналық ІІД баспасөз қызметіне сілтеме жасап.
"Полицияға жеке күзет фирмасының қызметкері хабарласып, түнгі 01:30 шамасында белгісіз біреулер күш қолданып, күзетшіні скотчтап тастағанын айтқан. Осылайша олар сауда орталығының аумағына кірмекші болған. Қаскөйлер күзетшінің жолға алып жүретін жеңіл радиостанциясын алып кеткен", — делінген хабарламада.
Елордалық ІІД қылмыстық полиция қызметкерлері "Сергек" видеожүйесі арқылы қарақшылық шабуыл жасағандар тобын ұстады. Күдіктілер уақытша ұстау изоляторына қамалды.
"Олар Жамбыл облысының 21-23 жас аралығындағы тұрғындары. Олар сауда орталығынан тонауды көздегендерін мойындады. Сотқа дейінгі тергеу шаралары "Қарақшылық" бабы бойынша жүріп жатыр", — деді ІІД өкілдері. Полицейлер олардың басқа да қылмыстарға қатысы бар-жоғын тексеріп жатыр.
Айта кетейік, 2017 жылы 15 қыркүйекте Астанада "Сергек" видеожүйесі арқылы түсірілген жол қозғалысы ережесін бұзушыларды әкімшілік жауапкершілікке тарту акциясы басталған еді.
