Лос-Анджелес маңында орман өртеніп, өрт үйлерге жайылды. 30 мыңнан астам адам қауіпсіз жерге көшірілді, деп хабарлайды Caravan.kz медиа порталы.
Калифорния билігінің хабарлауынша, орман өртінен қаза тапқандар саны бес адамға жетті, деп хабарлайды BBC.
Лос-Анджелес округінің шерифі Роберт Лунаның айтуынша, жалын әлі ауыздықталған жоқ, зардап шеккендер саны артуы мүмкін. Жағдайды қатты жел мен құрғақ ауа райы қиындатып отыр.
Билік Лос-Анджелес аймағында бес орман өрті жалғасып жатқанын, ал эвакуация аймақтарында 150 мың адам тұратынын хабарлады. Санта-Моника мен Малибу арасындағы Пасифик-Палисейдс аймағында ең үлкен өрт аумағы 60 шаршы шақырымнан асады.
Қазір оқиға орнында 700 өрт сөндіруші жұмыс істеуде. Өрттен 57 млрд доллар шығын келді. Билік жүз мыңнан астам адамға шұғыл қауіпсіз жерге көшуге нұсқау берді. Өрт 4 аумақта болып жатыр. Ең қиын жағдай Пасифик Палисейдс ауданында болған, қазір өрт жойылды.
Лос-Анджелес округі өрт сөндіру бөлімінің бастығы Энтони Марроненің айтуынша, өрт кем дегенде 1000 құрылымды қиратты.
Өрт аймағында Камала Харристің резиденциясы, сондай-ақ Бен Аффлек, Том Хэнкс сынды актерлер мен әнші Рианнаның үйлері орналасқан. Сәрсенбі күні TMZ актриса және әнші Пэрис Хилтонға тиесілі Малибу жағажайындағы үйлердің бірі толығымен өртеніп кеткенін хабарлады. Кейінірек мұны Хилтонның өзі растады.
TMZ сонымен қатар үйлері өрттен зардап шеккен Лос-Анджелестің басқа да танымал тұрғындары туралы хабарлайды. Бейсенбіге қараған күні түнде өткен баспасөз мәслихатында билік Лос-Анджелестің ең танымал аудандарының бірі, Голливудтың әйгілі белгісі орналасқан Голливуд төбешігі аймағында тағы бір өрт шыққанын хабарлады.
АҚШ президенті Джо Байден штаттың күш-жігерін толықтыру үшін федералды көмекке тапсырыс берді. Президенттің әрекеті Лос-Анджелес округіндегі зардап шеккендерге федералды қаржыландыруды қамтамасыз етеді. Көмекке уақытша тұрғын үй мен үйді жөндеуге гранттар, сақтандырылмаған мүліктік шығындарды жабуға арналған арзан несиелер және басқа бағдарламалар кіруі мүмкін.