Лукашенконың Қазақстанға сапары барысында бірқатар екі жақты келісімдерге қол қойылады деп күтілуде

Бұдан бұрын да хабарлағанымыздай, бүгін, 18-мамыр күні түстен кейін Беларусь лидері Астанаға келеді. Сапар барысында Елбасы Нұрсұлтан Назарбаев пен Беларусь президенті Александр Лукашенконың бетпе-бет кездесуі, сондай-ақ, екі ел өкілдерінің кеңейтілген құрамдағы бас қосуы өтеді.

Беларусь СІМ-нің ақпаратына сәйкес, кездесулер барысында отын-энергетикалық кешенді дамыту саласындағы ынтымақтастық туралы келісімге қол қойылады. Бұл — көлем мен сауда-саттық шарттары нақтыланбайтын рамкалы келісім болады деп күтілуде.
Беларусь СІМ-нің түсініктемесіне жүгінсек, Беларусь жағы отын-энергетика саласы бойынша Қазақстанмен өзара ынтымақтастықты дамыту туралы келісімнің жобасын сонау 2004-жылдың басында дайындаған. Онда Қазақстаннан жылына 2 млн. тонна мұнай сатып алу мүмкіндігі қарастырылды.
Беларусь СІМ-нің ақпаратына сәйкес, 2005-жылдың қаңтар-ақпан айларында Қазақстан мен Беларусь арасындағы тауар айналымы 24,3 млн. долларды құрап, 2004-жылғы тиісті мерзіммен салыстырғанда 66,3 процентке артты. Қазақстанға Беларусь Республикасынан негізінде машина жасау және химия өнімдері экспортталады. Беларусь экспортын дамыту жөніндегі 2000-2005-жылдарға арналған ұлттық бағдарлама бойынша Қазақстан бұл елдің ТМД аясындағы негізгі сауда әріптесі ретінде айқындалған.