"ЛУКОЙЛ" компаниясы Новороссийск маңындағы терминалдан Қарашығанақ мұнайы тиелген өзінің алғашқы танкерін жолға шығарды

Бүгін, 5-шілдеде "ЛУКОЙЛ" компаниясы Новороссийск маңындағы Южная Озерейка терминалынан Қарашығанақ мұнайгаз конденсаты кенішінен алынған үлесті мұнайы тиелген өзінің алғашқы танкерін жолға шығарды. Каспий құбыр консорциумы жүйесімен тасымалданған 134,9 мың тонналық CPC Blend сортты мұнайы "ЛУКОЙЛ" компаниясы жалдап алған Грекияның Aegean Lady танкеріне тиелді. Бұл туралы KZ-today тілшісіне "ЛУКОЙЛ Оверсиз Холдинг Лтд." компаниясының баспасөз қызметінен хабарлады.

«ЛУКОЙЛ» ААҚ 15 проценттік үлеспен біріккен Karachaganak Petroleum Operating (KPO) халықаралық консорциумы ұзындығы 635 шақырымдық «Қарашығанақ-Үлкен Шаған-Атырау» құбырымен Қарашығанақ кенішінен Каспий құбыр консорциумы жүйесіне (КТК) мұнай тасымалдау жұмыстарына 2004-жылдың орта шенінен бастап кіріскен.

КТК құбыр жүйесімен Қарашығанақ мұнайын тасымалдау көлемі жылына 6,5 млн. тоннаға жеткізіледі. Тамызда ай сайын тасымалданатын мұнай көлемі 600 мың тоннаға жетеді деп күтілуде.
2001-жылдың қазан айында пайдалануға берілген «Теңіз-Новоросийск» құбыр жүйесімен қазір айына 1,6 млн. тонна мұнай тасымалдануда. Қарашығанақ кеніші іске қосылу нәтижесінде алдағы бірнеше айда КТК айына 2 млн. тонна, немесе жылына 24 млн. тонна (тәулігіне 500 мың баррель) мұнай тасымалдауды жоспарлап отыр.
Қарашығанақ мұнайы құбырмен тасымалдана бастау нәтижесінде КРО КТК құбыр жүйесін мұнаймен қамтамасыз етуші «Теңізшевройл» ЖШС-нен кейінгі екінші ірі компанияға айналады.