М. Құл- Мұхаммед Астаналық және Қазақстандық Митрополит Александрмен кездесті

Мәдениет министрі Мұхтар Құл-Мұхаммед Астаналық және Қазақстандық Митрополит Александрмен кездесті. Мәдениет министрлігінің бүгін таратқан хабарламасы бойынша, министр қонақты Митрополиттік округтың басшысы лауазымына тағайындалуымен және Митрополит дәрежесіне көтерілуімен құттықтап, Қазақстан халқының игілігіне бағытталған жұмысына сәттілік тіледі.

Митрополит Александр Министрге жаңа каноникалық құрылымы — Қазақстан Республикасындағы Православ Шіркеуі Митрополиттік округінің құрылғаны туралы хабарлады. Сонымен қатар, Алматы епархиалдық басқармасының діни-мәдени орталығын кеңейту, Успен кафедралды соборының жанында әкімшілік және діни-мәдени орталықты салу туралы алға қойылған жоспарларын айтты.

Кездесу барысында Митрополиттік округ және ҚР Мәдениет министрлігі арасындағы өзара іс-қимылдың жағдайы мен перспективалары туралы ой бөлісілді. Осы орайда конфессияаралық ынтымақтастық, жас ұрпақтың рухани-өнегелі тәрбиесіне бағытталған ағартушылық және білім беретін бағдарламалар мәселелеріне ерекше назар аударылды.
М.Құл-Мұхаммед мәдениет, дін және тілдерді дамыту саласындағы жүргізілетін жұмыс туралы әңгімелеп, Митрополит Александр ұсынған бірқатар жобаларға жан-жақты қолдау көрсетуге ниет білдірді.