Оңай олжаға кенелмек болғандар 12 бас Ойсылқара тұқымын бір күнде жайылымда жүрген жерінен айдап әкеткен. Полиция барымташылардың ізіне бірнеше күн бұрын түсіпті. Бес адам Жаңаөзен қаласы маңындағы тастанды құрылыс нысанын қасапханаға айналдырған екен. Бұған дейін де малды осы жерде мүшелеп, базарға шығарып отырыпты. Сақшылар келгенде,ұрылар соңғы түйені жіліктеп жатқан. Ұрланған малдың етін базарға шығарып сатқан барымташылардың сыбайласы да ұсталды. Ал қылмыс ұйымдастырып, топқа жетекшілік еткен кәсіби қасапшы көрінеді.
Гүлзайда Түлеуғалиева, Маңғыстау облыстық ІІД баспасөз қызметінің бастығы:
— Сол жерде он екі түйенің терілері мен сирақтары табылып тәркіленді. Қылмыстық іс қозғалды. Тергеу амалдары жүріп жатыр. Оның қасындағы басқа адамдардың барлығы қазір тергелу үстінде.
