Мәжіліс Халықаралық қайта құру және даму банкінің "Агросервистік қызметтерді қолдау" жөніндегі жоба бойынша Қазақстанға грант бөлу туралы келісімді бекітуді мақұлдады

Мәжілістің жалпы отырысында сөз сөйлеген ҚР ауылшаруашылығы министрінің орынбасары Дулат Айтжановтың айтуынша, «грант қаржысы есебінен тұқым шаруашылығы, тқым асылдандыру ісі, мал дәрігерлік сала, фитосанитария, стандарттау және маркетинг, аграрлық ғылымды жетілдіру салаларында зерттеулер жүргізу көзделіп отыр». Оның хабарлауынша, 2001-жылы ҚР үкіметі Әлемдік банктен 623 мың доллар көлемінде грант алған.

2002-жылғы 24-шілдедегі хат бойынша Әлемдік банк операциялық шығындар қатарына кеңесшілерге арнап компьютер және кеңсе техникасын сатып алу тәрізді жаңа статьялар қосып, грант мерзімін 2003-жылдың 31-қазанына дейін ұзартты деді вице-министр.
Грант қаржысын мақсатты пайдалануға ашықтықты қамтамасыз ету барысын Әлемдік банктің өзі қадағалаумен бірге қаржының жұмсалуына халықаралық тәуелсіз аудит көмегімен тексеру жүргізілді,- деді ол.
Заң жобасы сенаттың қарауына жіберілді.