Оңтүстік Қазақстан облысында болған құйынның шығындары алдын-ала есеп бойынша 32 млн. теңгені құрады

Оңтүстік Қазақстан облысында 18-маусымда болған құйынның шығын көлемі алдын-ала 32 млн. теңгеге бағаланып отыр. Бұл туралы бүгін, 8-шілдеде KZ-today тілшісіне Оңтүстік Қазақстан облыстық мобилизациялық дайындық және төтенше жағдайлар жөніндегі департаменті төрағасының орынбасары Бексейіт Дүйсебаев хабарлады.

Б.Дүйсебаевтың айтуынша, бұл мәліметтер Шымкент, Төле би және Түлкібас аудандарынан басқа барлық аудандардан алынды. Аталған аудандарда есеп жұмыстары әлі аяқталған жоқ.

Алдын-ала мәлімет бойынша құйын салдарынан 129 мектеп, 5 кәсіптік-техникалық оқу орны, 12 аурухана мен емхана, 10 мәдениет сарайы, 15 клуб, 275 үй, 12 әкімшілік ғимараты мен 1 су қысымы мұнарасы бүлінген. Бұл ғимараттардың барлығының да шатыры жұлынып, терезе әйнектері мен таяныштары сынған. Сондай-ақ 125 электр бағаналары құлап, 59 электр қондырғылар мен 3 электротрансформаторға ақау келіп, 5,3 шақырым электр сымдары мен 80 метр кабель үзілген.
Аудандардан келген мәліметтерді облыстық комиссия қарап, төтенше жағдайлар жөніндегі арнаулы қордан қаржы бөлудің орындылығы туралы мәселені шешеді.