Оңтүстік Қазақстан облысының тергеу абақтысында парақор деп айыпталған аудан әкімінің орынбасары асылып өлді

Пара алды деген күдікпен қамауға алынған Оңтүстік Қазақстан облысы Отырар ауданы әкімінің орынбасары тергеу абақтысында асылып өлді. Бұл туралы облыстық эклономикалық және сыбайлас жемқорлық қылмыстармен күрес департаменті төрағасының орынбасары Теңізбай Шынтаев журналистерге мәлімдеді,- деп хабарлайды KZ-today тілшісі.

Әкімнің бірінші орынбасары жергілікті бір кәсіпкерден жер телімін бөліп бергені үшін 130 мың теңге пара алып жатқан сәтте, осыдан үш ай бұрын ұсталған болатын.

Тұтқынға ҚР Қылмыстық кодексінің «Пара алу жөніндегі» 311-бабы, 2-тармағы бойынша айып тағылған. Қылмыстық іс материалдары сотқа тапсырылды. Соттың алғашқы мәжілісі өткен жұмада өтуге тиіс болатын. Айыпкер дәл сол күні абақтыда асылып өлді, дейді Т.Шынтаев.
Қазір әділет департаментінің қызметкерлері оқиғаның себептерін тексеріп жатыр.