Орал қаласында жолақы мәселесі талқыланды

Орал қаласы тұрғын үй-коммуналдық шаруашылық және автомобиль жолдары бөлімінің сектор меңгеруші­сі Асқар Мұқановтың айтуынша, бүгінгі таң­­да қала халқына барлығы 316 автобус, 169 шағын автобус қызмет көрсетуде. Өткен жылы №1 «ПАП» («Жолаушылар автокәсіпорны») ЖШС 10 үлкен автобус, «ОралТехСервис» ЖШС 20 үлкен және 15 орташа көлемді автобус, «ЗКАП» ЖШС 7 үлкен автобус және «Оралавтотранс» ЖШС 5 дана «Мерседес» маркалы үлкен автобусты несиеге алған. Бұлардың ішінде 32 автобус арбаға таңылған мүгедек жандарға арналған көтерілгіш құралмен жабдықталған. Қазіргі уақытта жолаушылар тасымалымен айналысатын мекемелерге диспетчерлер пунктінің ұйымдастыруымен автобустар қозғалысын онлайн режімінде бақылайтын мониторингтің спутниктік жүйесі орналастырылуда. Жолаушылар тасымалымен айналысатын мекемелер үшін қазіргі таңдағы ең түйткілді мә­селе - жүргізушілердің тапшылы­ғы. Мекеме басшыларының пікірін­ше, жалақысы төмен жұмысқа жұрттың бар­ғысы келмейді. Қазіргі таңдағы автобус жүргізушілерінің орташа жа­ла­қы­­сы 25-30 мың теңгені құрайды. Қа­ла­да­ғы жолаушылар тасымалын қамта­ма­сыз етіп отырған мекеме жетекшілері­нің атынан сөйлеген «УралТехСервис» ЖШС құрылтайшысы Александр Баклан жиналғандарға жанар-жағармай бағасының аспандап кетуіне байланысты автобус билетінің бағасын көтеруді көздеп отырғандарын айтты. Оның мә­­лім­деуінше, қолданыстағы билет ба­ға­сы жолаушы тасымалдаушылардың шы­ғындарын жаппайды. Күнделікті тасымал жұмысына кететін жанар-жағар­май мен жалақы төлеуге және жаңадан алынған автобустардың қарызын жа­буға жұмсалатын шығынды тап-тұй­нақ­тай есептеп, жиналғандар назары­на ұсынған ол мекеме шығынын жабу үшін жолақыны шамамен 74,4 теңгеге көтеру қажет деген ұсынысын жеткізді. Бұған қарсылық білдірген қалалық экономика және бюджеттік жоспарлау бөлімі бастығының орынбасары Софья Кенжегереева нақты деректерді негізге алып есептеген жағдайда жолақыға бұдан төмендеу бағаны ұсынуға болатынын айтты. Мәселен, депутат Мақсот Берген кәсіпкерлер ұсынған бағаның қала халқының қалтасына ауыр тиеті­­нін айтып, әзірге 60 теңгеге көтерсеңіз­дер де, жарайды деген пікірін жеткізді. Оның бұл ойына қарсылық білдіруші­лер болғанымен, қатысушылардың кө­бісі М.Бергеннің осы пікірін жөн көрді. Депутаттар мен кәсіпкерлер арасын­да­ғы айтыс-тартысты таразыға салған қала әкімінің орынбасары Ғалым Орынғалиев қалалық экономика жә­не бюджеттік жоспарлау бөлімінің нақ­­ты есептеуін ескеріп, депутаттар ұсынған бағаның шамаға соғатынын айтты. Оның сөзінше, қалаішілік ав­тобус би­летінің жаңа бағасы, шамамен 1 нау­рыз, бәлкім, сәуір айының біріне қарай бекітіліп, қолданысқа енбек.