Байқауға Орал қаласы мен облыс аудандарынан барлығы 17 үміткер қатысты. Олар Мұқағали өлеңдерін мәнерлеп оқып қана қоймай, өзегінен жарып шыққан өз жырларын да қазылар алқасының назарына ұсынды. «Менің пірім — Мұқағали» деп жыр төккен оқушылар ақын шығармашылығын барынша білетіндігін аңғартты.
Сайыстың алты кезеңінен сүрінбей өткен Орал қаласындағы облыстық дарынды балаларға арналған мамандандырылған мектеп-интернатының 11-сынып оқушысы Дәурен Сағынғалиев жеңімпаз атанды. Енді ол биыл 80 жылдығы кеңінен тойланып жатқан Мұқағали Мақатаевтың туған жері Қарасазда өтетін республикалық байқауға қатысады. Өткен жылы дәл осы сында дарынды балаларға арналған С.Сейфуллин атындағы №11 облыстық мектеп-интернаты кешенінің шәкірті Оралбек Ысқақ жеңімпаз атанған болатын.
Қазылар алқасының төрағасы, профессор Серікқали Шарабасовтың айтуынша, байқау деңгейі жыл сайын көтеріліп келеді.
