Орталық сайлау комиссиясы парламент мәжілісінің сайлауына қатысушы саяси бірлестіктердің партиялық тізімін тіркеуді аяқтады

ҚР Орталық сайлау комиссиясы парламент мәжілісі депутаттарының сайлауына қатысушы саяси бірлестіктердің партиялық тізімін тіркеуді аяқтады. Бүгін, 18-тамызда Орталық сайлау комиссиясы Қазақстанның демократиялық партиясының партиялық тізімін тіркеді. Үміткерлердің жеке куәліктері мен тіркелу туралы куәлікті партия жетекшісі Мақсұт Нәрікбаевқа ҚР Орталық сайлау комиссиясының төрайымы Зағипа Балиева табыс етті,- деп хабарлайды KZ-today тілшісі республика Елордасынан.

Қазақстанның демократиялық партиясының партиялық тізімінде М.Нәрікбаев басқарған 9 адам бар.

Сөйтіп, парламент мәжілісі депутаттарының сайлауына елімізден сегіз партия мен екі блок қатысатын болды.
Ал 19-тамыз күні түн ортасында ҚР Орталық сайлау комиссиясы бір мандатты округтер бойынша мәжіліс депутаттығынан үміткерлерді тіркеуді аяқтайды. 18-тамыз күнгі таңертеңгі жағдаймен өз кандидатурасын ұсынған 681 адамның 592-сі тіркелді. 30 адам үміткерліктен бас тартты.
Еліміздегі мәжіліс сайлауы 19-қыркүйекте өткізіледі.