Орынбор облысы мен Қазақстан арасындағы жалпы сауда айналымының 65 проценті Батыс Қазақстан облысының үлесінде - Орынбор облыстық әкімшілігінің төрағасы

Оның айтуынша, Орынбор облысының жалпы сыртқы сауда айналымы 2 млрд. доллардан асады, оның 420 млн. доллары Қазақстанның, соның ішінде 65 проценті Батыс Қазақстан облысының үлесіне тиеді. Бұл Қарашығанақ кенішінен Орынбор мұнай өңдеу зауытына көмірсутегі шикізатын беруге байланысты. 2003-жылы Қарашығанақтан Орынборға импортталған табиғи газ көлемі 123209 мың долларды, экспорт 57866,6 мың долларды құрады. Экспортталған газ конденсаты 74791,1 мың доллар болды.

Қазіргі жағдаймен Орынбор цемент зауыты өнімдерінің 10 проценті де Батыс Қазақстан облысына сатылады. Тұрғын үй бағдарламасы жүзеге асырылуға байланысты Ресей жағы облысқа сатылатын құрылыс материалдарының мөлшерін арттыруға дайын. Сондай-ақ, Орынбор зауыттарынан экспортталатын өнімдер арасында мұнай өнімдері, әк тас, қара және түсті металлургия өнімдері, арнаулы жабдықтар мен азық-түлік өнімдері бар. Орынбор облысында Қазақстан капиталының қатысуымен 56 бірлескен кәсіпорын тіркелген. Олардың төртеуінің құрылтайшысы Батыс Қазақстан облыстық кәсіпорындар.
А.Чернышев екі облыс арасындағы болашақ экономикалық және мәдени ынтымақтастықтың маңызын ерекше атап өтті. Ол сондай-ақ, Батыс Қазақстандықтарды Орынбор офтальмологиялық орталығы мен қатерлі ісік дерттерін бастапқы сатыда анықтап емдеу жөніндегі ТМД бойынша жалғыз жабдықпен жарақталған онкология орталығында емделуге шақырды.