Партиялық тізім бойынша мәжіліс сайлауының нәтижесінде "Отан" партиясы сайлаушылардың 60 процентінен астамының дауысын жинады - Орталық сайлау комиссиясы

Парламент мәжілісі сайлауының қорытындысына сәйкес, партиялық тізім бойынша "Отан" партиясы сайлаушылардың 60,62 процент дауысын жинап, жеңіске жетті. Бұл туралы бүгін, 23-қыркүйекте Астанада өткен баспасөз мәслихатында Орталық сайлау комиссиясының төрайымы Зағипа Балиева мәлімдеді,- деп хабарлайды KZ-today тілшісі.

Орталық сайлау комиссиясының мәліметі бойынша, «Отан» өкілдері партиялық тізім бойынша депутаттарға қарастырылған 7 орынды иемденеді.

Сайлаушылардың 12,04 процент дауысын жинап екінші орынға шыққан «Ақ жол» партиясы бір орынға ие болмақ. Ал үшінші орында 11,38 процент дауыс жинаған «Асар» партиясы. Бұл партияның үлесіне де бір орын тиеді. Сайлаушылардың 7,07 процент дауысын жинаған «АИСТ» блогы бір орынды жеңіп алды.