Павлодар облысында Ертістен өту барысында 16 жастағы бозбала суға батып кетті

Павлодар облысының Качиры ауданы орталығында Ертістен өту барысында ДТ-75 тракторы мұздың астына түсіп кетті. Тракторда бұл сәтте Качиры ауданында тұратын 16 жастағы бозбала мен оның әкесі болған. Бұл туралы KZ-today тілшісіне Павлодар облыстық төтенше жағдайлар жөніндегі басқармасының судан құтқару қызметінен хабарлады.

Құтқарушылардың ақпаратына сәйкес, әкесі трактордан шығып үлгерген, ал оның ұлын құтқарып алу мүмкін болмады. «Қазір оқиға орнында сүңгуірлер жұмыс істеп жатыр. Олар қаза тапқан жігіт пен тракторды іздестіруде»,- дейді судан құтқару қызметіндегілер.

Құтқарушылардың айтуынша, облыстың бұл ауданында Ертіс арқылы қысқы өткел ашылған жоқ. Өйткені, мұздың қалыңдығы 15-25 см ғана.