Қазақстан мен Қырғызстандағы Польшаның Бас консулы, Титулдық Елші Веслав Осуховский Алматыда өткен Польша-Қазақстан бизнесі кешінде осылай айтты.
«Польшада бизнесті жүргізуге барынша сенімді мемлекеттерді анықтау мақсатында кәсіпкерлер арасында зерттеу жүргізілген болатын. Олар өз бизнесін жүргізуге барынша сенімді елдер қатарында Ресей, Украина, Германия, Қытай және Қазақстан мемлекеттерін атады. Экономика министрлігі кәсіпкерлер пікірін ескере отырып, екіжақты ынтымақтастықты дамытудағы ең маңызды келешегі зор нарықтарды белгіледі. Олар: Бразилия, Алжир, Түркия және Қазақстан», — дейді В.Осуховский. Оның айтуынша, Қазақстанда келесі жылы Польша бизнесін, Польша экспортын ілгері жылжытудың мемлекеттік бағдарламасы бойынша бірқатар іс-шаралар жүзеге асырылмақ. Атап айтқанда, еркін экономикалық аймақтар форумын, Польша өнеркәсібінің көпсалалы көрмесін өткізу жоспарланып отыр.