Бұл туралы Caravan.kz медиа порталы Zakon.kz-ке сілтеме жасап хабарлайды.
Жуырда А.Н. Сызғанов атындағы Ұлттық ғылыми хирургия орталығы еліміздің медицина тарихында тұңғыш рет бір мезетте үш науқасқа үш донордың бүйрегін тоғыспалы трансплантация тәсілімен салатын аса күрделі операцияны сәтті өткізді.
Президент белгілі хирург, профессор Болатбек Баймахановтың жетекшілігімен жасалған бұл операцияны отандық медицинаның зор жетістігі ретінде бағалап, орталық ұжымына Алғыс хат жолдады.
«Мемлекет денсаулық сақтау саласын дамытуға баса мән береді. Бұл ретте көптеген іргелі бастама қолға алынып, ауқымды жұмыс атқарылып жатыр. Соның нәтижесінде ұлттық медицина қарқынды дамып келеді. Сіздер жасаған бірегей операция – соның айқын дәлелі. Қазір еліміз өте күрделі трансплантациялық операция жасайтын әлемдегі алты мемлекеттің қатарына кіреді. Бұл жетістікке отандық мамандардың, соның ішінде өздеріңіздің қажырлы еңбектеріңіз бен ерекше білімдеріңіздің, сондай-ақ теңдессіз тәжірибелеріңіздің арқасында жетіп отырмыз. Баршаңызға шынайы ризашылығымды білдіремін. Болашақта да ұлт саулығын жақсарту үшін тынымсыз тер төгіп, халқымызға қалтқысыз қызмет ете бересіздер деп сенемін», – делінген Алғыс хатта.
2025 жылдың 16 сәуірінде ҚР Денсаулық сақтау министрлігі бұл операция туралы хабарлады. Бір күнде, 12 сағаттың ішінде туыстарымен медициналық сәйкес келмейтін науқастар арасында үш донорлық операция және үш бүйрек трансплантациясы жасалды. Заманауи әдістің арқасында олардың әрқайсысы жаңа өмірге мүмкіндік алды.
«Жаңа ота әдісі бір уақытта бірнеше орган трансплантациясын жасауға мүмкіндік береді және бір-бірімен туыстықсыз донорлар мен реципиенттер арасында көлденең жүргізіледі. Басқаша айтқанда, туысқан донор қан тобы немесе тіндері сәйкес келмеуіне байланысты жақынына көмектесе алмаса, дәрігерлер осыған ұқсас жағдайы бар басқа отбасын табады. Ал жұптар бір-бірімен қиылыса, алмастыру операциясы жасалады», – дейді министр.
Қазақстан АҚШ, Ұлыбритания, Израиль, Түркия және Үндістан сияқты жоғары технологиялық интервенциялар жүргізілетін әлемдегі алты елдің қатарына кіреді. 2019 жылы Түркияда жеті донор мен жеті реципиент қатысатын ең үлкен көлденең бүйрек трансплантациясы жасалды.