Қарлы боран бірнеше облыстың тіршілігін тұралатып тастады

Кеше ғана жаңбыр жауып, көктайғақ болып жатқан Арқада бүгін ақтүтек боранға ұласып, қарға адым жер көрінбей қалды. Салдарынан жүздеген жүк көлігі ауа-райының қыңыр мінезінен қаңтарылып тұр. Еліміздің солтүстігінде соққан дүлей боран ұшақтардың ұшу кестесіне де өзгеріс енгізді. Жолаушылардың өміріне алаңдаған Авиация комитеті Алматы мен Астана әуежайындағы бірнеше рейсті кейінге қалдырды. Мектептер де уақытша жабылып, оқушылар сабақтан босатылған. Ал, синоптиктер қарлы боран ертең бірақ тоқтайтынын айтып отыр.