Парламенттік тыңдау барысында сенатор Сергей Ершов министрден жол полициясы арасындағы жемқорлықтың жоғары екендігін айтып, оны төмендету үшін қандай шаралар қолға алынатындығын сұраған еді.
«Қазір біз Грузияда жемқорлықпен күрес жақсы жүргізіліп жатқандығы жайында жиі оқитын болдық. Сіздер тарапынан Грузия тәжірибесі зерделенді ме және ол қызықты ма әрі бізде де қолдануға бола ма?» — деді сенатор Қасымовқа қарата.
«Грузияға біздің қызметкерлер бірнеше мәрте барды, барлық қызметтер комиссия болып та барып қайтты. Ол жақтағылар полиция қызметкерлерінің бәрін жұмыстан шығарып жіберіп, айлықты 2 есе көтерген. Содан кейін жаңадан жұмысқа алған. Мархабат. Біз мұндай қадамға баруға дайынбыз», — деді министр.
Сонымен қатар ол Қазақстан полициясын Германиядағыдай, Америкадағыдай жасау қажет деген пікірдің жиі айтылатындығын атап өтті.
«Біз бұл тәжірибелердің барлығын зерделедік. Меніңше, германиялық, америкалық полицейлердікіндей жалақы, техникамен және мүмкіншіліктермен қамтамасыз етер болсақ, онда бізде дәл сондай нәтижеге қол жеткізе аламыз», — деді Қасымов.