Бүгін «Нұр Отан» ХДП-ның орталық аппаратында өткен баспасөз мәслихаты барысында аталған партияның хатшысы Мұхтар Ерман бұл байрақты бәсекелердің еліміздің тәуелсіздігінің 20 жылдығы қарсаңында өтуі ұлттық жетістіктермізді паш етуге зор мүмкіншілік тудырып отырғандығын баса айтты.
Ал 1-ші қысқы Азиада ойындарын өткізу жөніндегі астаналық дирекцияның бөлім бастығы Ербол Жайлауовтің сөзіне қарағанда, елімізде алғаш рет өткізілгелі отырған байқау Қазақстанның, сонымен қатар Азия елдерінің жастарын мәдениетке, спортқа, салауатты өмір салтына тарту мақсатында өткізіліп отыр. Аталған іс-шараға өтініштерді қабылдау қарашаның 1-іне дейін жалғасады. Қазақстан жас өспірімдері өз жұмыстарын тікелей ұйымдастыру комитетіне жіберетін болса, Азия тұрғындары Ұлттық олимпиада комитетіне жолдаулары керек.
«Жас суретшілер «Менің Азиада ойындарым, менің үмітім», «Мен және Ирби», «Астана мен Алматы 7-ші қысқы Азиада ойындарын қабылдайды» деген үш тақырыптың бірін, сондай-ақ ал эссе авторлары да «Спорт салауатты өмір салты ретінде», «Астана мен Алматы 7-ші қысқы Азиада ойындарын қабылдайды» және «Менің өмірімдегі қысқы спорт түрлері» деген тақырыптардың бірін таңдауға ерікті», дейді М.Ерман.
Ербол Жайлауовтің сөзіне қарағанда, байқаудан озып шыққан 4 жасөспірім 2011 жылы қаңтардың 30-ында елордада өтететін Азиаданың салтанатты ашылуына шақырылады. Сондай-ақ байқауда үздік танылған жастар сертификатқа ие болып, түрлі бағалы сыйлықтармен марапатталады. Жалпы байқау жеңімпаздарын құрамында Ұйымдастыру комитетінің, АОК Білім және ғылым комитетінің өкілдерімен қатар белгілі суретшілер мен жазушылардан тұратын топ анықтайтын болады.